Liebs Bascheli,
mit schwerem Herz hämmer dich nach fascht 19 Jahr müesse gah la. Du häsch eso vill Freud und troscht ist Altersheim bracht und villne wo trurig gsi sind es lächle is Gsicht zauberet. Scho als chlises Büseli bisch gärn in es Bett ine gläge und häsch dich gärn flatiere und chnuddle la. Häsch die einte Bewohner uf em Spaziergang, mängmal ufemene Rollator sitzend begleitet. I dä Advänz und Wiehnachtszit isch din Lieblingsplatz i da Chrippe gsi, näbe all däne Hirte und Schöfli häts dänn en grosse Leu gha und d Lüt händ sich drüber immer gfreut. Häsch eus au vill Gschänkli i form vonere Muus, hei bracht, was die einte Mitarbeiter zum schreie bracht hät. Liebs Bascheli, mir danket dir für die schöni Zyt mit dir, für all die Schöne Momänt, für all die Freud und Troscht wo du eus allne gäh häsch.
Mir vermisset dich fescht.
Dini Altersheimcrew