Sheila ? 17.6.2008 – 12.2.2019

Liebs Müüsli, jetzt bisch schu bald 3 Wuche nüme be üs, es duet so fescht weh! Immer wieder denki obi z Richtige gmacht han, aber du heschmr in de letschte Täg so oft zeigt, dass kei Kraft meh hesch. Du hesch am letschte Tag, bevor mier dich hen müesse goh loh, soviel Sache gmacht wo du sus in dine 10 Johr nie gmacht hesch. Wie du die letschte Sunnestrahle ufm Balkon gnosse hesch, imne Körbli wo du sus nie glege bisch, wie du gnau gwüsst hesch, dass Zit cho isch zum goh! Du hesch immer so gern mit mier kuschelet, aber am letschte Tag hesch du eifach nüme möge! Ich hoff du bisch üs nit bös, das mier dich goh loh hend, aber mier hen nur z beschte für dich welle, so wie immer!
So viel Tierarztbsüech hesch die letschte 2 Mönet müesse überstoh, mier hend alles geh zum dis Lebe z rette! Wos dier nach dr Infusion so viel besser gange isch sind mier so happy gsi, aber leider isch nachher d Schockdiagnose Lungetumor cho. Mier hen die letschte Täg wos dier na guet gange isch sehr gnossä mit dier!
Ich werd de Moment niemeh vrgesse wo du din Kopf so fescht in dim Körbli vergrabe hesch. Sheila du fehlsch üs so fescht! Du hesch üs soviel Liebi geh in dere wunderschöne Zit, bisch immer do gsi wenns mier nit guet gange isch.
Ich hoff es goht dier besser, döt wo du jetzt bisch! Machs guet min liebe Schatz!