Liebi Bonita
Am 12. Juli 2026 hesch du uns für immer miesse vrloh.
Mir sin unändlich truurig, aber zueglich überglücklig über die so langi Zyt, wo mir mit dir hän dörfe vrbringe!
Du bisch über16 Joor unseri treuschti Begleiterin gsi und hesch uns in däre Zyt unändlig vyyil Freud bereitet. Mit dinere warmhärzige, liebenswürdige und verspielte Art hesch du dir vo Afang a e feschts Plätzli in unsere Härze verschafft.
Du hesch uns unzähligi Stunde mit unvergässliche Erläbnis gschänggt. Mir gsehn di no hüt wie du in de Wasserleitige in Gräche umeweidlisch, im Winter wie e Schneehääsli umehüpfsch und de Schneebäll noche rennsch, jä in de Bergwelt hesch du di soo wohlgfühlt!
Au dr Gardasee het dir grosse Spass gmacht, wo du immer widr Stei usem See duesch fische, und im Summer im Garte in aller Rueh duesch sünnele.
Du bisch sone zfriedeni und pflägeliechti Begleiterin gsi, für das sin mir dir unändlig danggbar! Sone treui Begleiterin wie du’s gsi bisch, gits glaub wirklig nur eimol, Dangge!
Mir vrliere e liebs und wärtvolls Familienmitglied! Dini guetmietigi Art und di treue Blick wärde mir nie vrgässe!
Bonita, unseri kleini Muus mir danke dir vo Härze für die wunderschöne 16 Joor, wo du bi uns gsi bisch!
In unsere Härze wirdsch du immer witer läbe!
In Liebi, Dini Familie
Ruth, Klaus, Andrea und Daniela