Mini chli Chase, mini Prinzessin, mini allerbest Fründin
am 05.09. hend mir Di mit unglaublich schwerem Herze goh loh. Es isch so schnell passiert, und au wenn i gwüsst ha, dass de Tag mol chunnt, hani immer denkt, du wirsch no so viel länger i dem Lebe bi mir si.
I het nie denkt, dassi i mim eigene Dihei Heiweh cha ha. Aber eifach alles a dir fehlt mir: Dini herzliche Blick, dis Schnurre, dini Wärmi, dis Miauze sobalds dir uf mim Schoss bequem gmacht- und mir din Buuch aneghebt hesch..Dini Lieblingsplätzli sind etz leer und dis Plüsch-Einhorn unberüehrt. Und au wenni weiss, dass ebe nüme jede Moment um de Egge laufe und mi begrüesse wirsch, spüri und i weiss, dass mir für immer verbunde si werdet und du uf e anderi Art und Wiis bi mir und dim Brüederli Chopper bisch und üs begleite wirsch, bis mir z 3. wieder vereint sind. Bis denn weiss i, bisch vo vielne liebe zwei- und vierbeinige Seele guet umgeh, ohni Schmerz, mit ganz viel Liebi und Wärmi.
Danke für die wunderschöne 12.5 Johr, mini Zuckermuus. I cha mini Liebi für Di nöd i Wort fasse und bi überzügt, dass mir üs wieder findet.
Bis bald, mis chline Meitli. I lieb Di über alles – für immer und ewig ❤️